मनाचे श्लोक
ॐ
|| श्रीहरि: ||
श्रीसमर्थरामदासस्वामीविरचित
मनाचे श्लोक
जगीं व्दादशादीत्य हे रुद्र आक्रा |
असंख्यात संख्या करी कोण शक्रा |
जगीं देव धुंडाळितां आढळेना |
जनीं मुख्य तो कैसा कळेना || १७६ ||
तुटेना फुटेना कदा देवराणा |
चळेना ढळेना कदा दैन्यवाणा |
कळेना कळेना कदा लोचनासी |
वसेना दिसेना जगीं मीपणासी || १७७ ||
जया मानला देव तो पूजिताहे |
परी देव शोधूनि कोण्ही न पाहे |
जगीं पाहतां देव कोट्यानकोटी |
जया मानली भक्ति जे तेचि मोठी || १७८ ||
तिन्ही लोक जेथूनि निर्माण जाले |
तया देवरायासि कोण्ही न बोले |
जगीं थोरला देव तो चोरलासे |
गुरुवीण तो सर्वथा हीं न दीसे ||१७९ ||
गुरु पाहतां पाहतां लक्ष कोटी |
बहुसाल मंत्रावळी शक्ती मोठी |
मनीं कामना चेटकें धातमाता |
जनीं वेर्थ रे तो नव्हे मुक्तिदाता || १८० ||
नव्हे चेटकी चाळकु द्रव्यभोंदु |
नव्हे निंदकु मछरु भक्तिमंदु |
नव्हे उन्मतु वेसनी संगबाधु |
जगीं ज्ञानिया तो चि अगाधु || १८१ ||
नव्हे वाउगी चाहुटी काम पोटी |
क्रियेवीण वाचाळता ते चि मोठी |
मुखें बोलीयासारखें चालताहे |
मना सद्गुरु तो चि शोधूनि पाहे |
जनीं भक्त ज्ञानी विवेकी विरागी |
कृपाळू मनस्वी क्षमावंत योगी |
प्रभु दक्ष वित्पन्न चातुर्य जाणे |
तयाचेन योगें समाधान बाणे || १८३ ||
वसुधालय 