मनाचे श्लोक

    ॐ
|| श्रीहरि ||
मनाचे श्लोक ( मराठी )
श्रीसमर्थ रामदासस्वामीविरचित
मना राम कल्पतरु कामधेनु |
निधी सार चिंतामणी काय वानूं |
जयाचेनि योगें घडे सर्व सत्ता |
तया साम्यता कायसी कोण आतां || ६० ||
उभा कल्पवृक्षातळीं दु:ख वाहे |
तया अंतरी सर्वदा तें चि आहे |
जनीं सज्जनीं वाद हा वाढवावा |
पुढें मागुता शोक जीवीं धरावा || ६१ ||
निजध्यास तो सर्व तूटेनि गेला |
बळें अंतरी शोक संताप ठेला
सुखानंद आनंद भेदें बुडाला |
मनीं निश्र्चयो सर्व खेदें उडाला || ६२ ||
घरीं कामधेनू पुढें ताक मागे |
हरीबोध सांडूनि वेवाद लागे | करीं सार चिंतामणी काचखंडें |
तया मागता देत आहे उदंडें || ६३ ||
अती मूढ त्या दृढ बुधी असेना |
अती काम त्या राम चित्तीं वसेना |
अती लोभ त्या क्षोभ होईल जाणा |
अती विषयी सर्वदा दैन्यवाणा || ६४ ||
नको दैन्यवाणे जिणें भक्तिऊणें |
अती मूर्ख त्या सर्वदा दु:ख दूणें |
धरीं रे मना आदरें प्रीति रामीं |
नको वासना हेमधामीं विरामीं || ६५ ||
नव्हे सार संसार हा घोर आहे |
मना सज्जना सत्य शोधूनि पाहें |
जनीं वीष खातां पुढें सूख कैचें |
करी रे मना ध्यान या राघवाचें || ६६ ||
घनशाम हा राम लावण्यरूपी |
महां धीर गंभीर पूर्णप्रतापी |
करी संकटीं सेवकाचा कुढावा |
प्रभाते मनीं राम चिंतीत जावा || ६७ ||

मनाचे श्लोक

     ॐ
|| श्रीहरि ||
मनाचे श्लोक ( मराठी )
रामदासस्वामीविरचित
क्रमी वेळ जो तत्वचिंतानुवादें |
न लिंपे कदा दंभ वादें विवादें |
करी सूखसंवाद जो ऊगमाचा |
जगीं धन्य तो दासा सर्वोत्तमाचा || ५२ ||
सदा आर्जवी प्रीय जो सर्व लोकीं |
सदा सर्वदा सत्यवादी विवेकी |
न बोले कदा मिथ्य वाचा त्रिवाचा |
जगीं धन्य तो दास सर्वोत्तमाचा || ५३ ||
सदा सेवि आरण्य तारुण्यकाळीं |
मिळेना कदा कल्पनेचेनि मेळीं |
चळेना मनीं निश्र्चयो दृढ ज्याचा |
जगीं धन्य तो दास सर्वोत्तमाचा || ५४ ||
नसे मानसीं नष्ट आशा दुराशा |
वसें अंतरीं प्रेमपाशा पिपाशा |
ऋणी देव हा भक्तिभावें जयाचा |
जगीं धन्य तो दास सर्वोत्तमाचा || ५५ |
दिनाचा दयाळु मनाचा मवाळु |
स्नेहाळु कृपाळु जनीं दासपाळु |
त्या अंतरीं क्रोध संताप कैचा |
जगीं धन्य तो दास सर्वोत्तमाचा || ५६ ||
जगीं होईजे धन्य या रामनामें |
क्रिया भक्ति उपासना नित्यनेमें |
उदासीनता तत्वता सार आहे |
सदा सर्वदा मोकळी वृत्ति राहे || ५७ ||
नको वासना विषईं वृत्तिरूपें |
पदार्थीं जडे कामना पूर्वपापें |
सदा राम नि:काम चिंतीत जावा |
मना कल्पनालेश तो ही नसावा || ५८ ||
मना कल्पना कल्पितां कल्पकोटी |
नव्हे रे नव्हे सर्वथा रामभेटी |
मनीं कामना राम नाहीं जयाला |
अती आदरें प्रीति नाहीं तयाला || ५९ ||